《給姑奶的道歉家書》
今次返意大利除咗出席咗意佬朋友嗰個「晚9朝5」嘅婚宴外，還有一段小插曲。剛落機一到屋企，由入門口開始，見到下列情況：
😐廚房碗布由鮮黃～>淺啡色
🤨廁所抹手布由卡其~>淺紫色
🤔意佬件鮮紅色睡衣~>淡紅色
我不斷唸咒:「我睇佢唔到、佢睇我唔到」期盼尋求心靈一份安寧，因為我知道一件深色衫唔會自己跳落淺色衫度洗白白😳
「啱啱落機返嚟，不如唔好煮，返阿媽度食午餐啦？」
我二話不說答應咗，一打開衣櫃揾衫……
嘩～～～啊～～～呀～媽呀～～！
😱我件新買嘅暗花白底裇衫～>粉！紅！色！嘅😱
即係咁，「國有國法 家有家規」，本娘屋企深受「自治領土」教育，個個都好守規矩嘅：
👉凡唔係自己的東西，借前要問，用完要還。
👉整壞整爛人家的東西必須利申
👉去完廁所要打開廁所板抹乾淨
👉毛巾一面抹頭部，一面抹身
👉吹完頭髮要自己執返頭髮
喺呢一刻，我真係好希望有人會話比我知點解件衫被染色，但卻無人通知我事發經過。就好似你射臭彈前要舉黑𣄃通知人撤一樣，起碼通知聲吖大佬啊😤😤
終於到了奶奶家食飯，咁啱電視既意大利新聞台報導緊香港戰況，所以sor9ly我真係笑唔出。奶奶同姑奶輪流問我做乜股起泡鰓，我一味話因為擔心香港，所以心情麻麻。姑奶鍥而不捨連炮追問，結果意佬爆響口，話我嬲咗姑奶洗喎咗我件新衫……
姑奶即刻眼濕濕，喊住口咁話：「其實我老公都勸我咪鬼去執屋嫁喇，係咁問點解唔叫你哋自己俾錢請鐘點去抹屋喎……」下省一千字……
嗰刻我完全唔知俾咩反應，佢委屈時我都自覺更委屈，於是乎同佢搓咗幾板。但畢竟佢始終係我長輩，自己冷靜落嚟反思再反思，於是我去揀咗一份小禮物，同寫咗一封信俾姑奶：
「親愛的姑奶，抱歉令你傷心。我不是故意令你難受的，但當我發現件粉紅色衫時，我被嚇呆了。我相信如果我喺親眼見到件衫被染色前收到你嘅通知，我會容易啲消化成件事。畢竟其實只係區區一件衫，舊咗都要換（其實係新買的😥）我只是需要少少時間去忘記它。冇人希望有呢個意外發生，我希望你接受我呢份小禮物，藉着呢個機會，講你知我一直以來唔知點啟齒嘅心底話。無論係你或奶奶堅持要幫我哋打掃間屋，我都一直好感激。我認為結婚唔一定要有屋，加上我倆居無定所，每次返嚟都只逗留僅僅一兩星期，特登買間屋實在大材小用，有間屋存在而我哋喺外地時，只會令你哋更費心費神。
既然間屋係我哋嘅，為何要你哋兩位唔喺間屋住嘅長輩走去打掃呢？你哋真係冇義務去花費額外嘅心神去打理。我唔知你同意佬之間有什麼協定，我曾提議俾返錢你，又怕令你感到尷尬（意大利人是很容易感覺被冒犯的）……既然如此，請不要再特意跑到我哋屋企打掃，原諒我嘅小學雞意大利文，希望你睇得明。」
姑奶回覆我，佢好欣賞我，亦向我道歉。感恩呢個「港女」弟婦可同大家坦承相對，話自己大頭蝦唔記得同我講佢唔小心將深色同淺色衫撈埋一齊洗。其實佢好鍾意我哋屋企嘅所有擺設，所以從來唔覺得自己去搞衛生做咗免費賓賓。
姑奶一言道出「我可以脾氣暴躁，但我絕對很愛你和我細佬，從來你都對我們好好，讓我們來個大擁抱吧！」
‘You learn nothing from your life
if you think that you are right all the time.’
人誰無錯？但人越大好似越難去認錯。起初我都心大心細，驚姑奶唔知點諗。雙手遞過家書後，估唔到反而令姑奶對我另眼相看，仲大讚我勇於坦白、承擔。
我呢個小學雞意大利媳婦因文化差異又上了寶貴的一課。
其實如果每個人都為自己做過嘅事情負責任，錯要認，願意維繫彼此的尊嚴與關係，我相信呢個世界，甚至香港一定更安寧。
#人誰無錯
#其實認錯係咪真係咁難開口
#道歉的智慧
#四海為家後遺症
#原諒我的小學雞意文
#好彩有糕糕燦哩幫手
#嫁意大利初級弟婦
Search